Շանթ Հարությունյանն արդեն տանն է


«Ցեղակրոն» կուսակցության առաջնորդ, 6 տարվա ազատազրկման դատապարտված Շանթ Հարությունյանը քիչ առաջ համաներմաբ ազատ արձակվեց «Վարդաշեն» ՔԿՀ-ից:

Մեր տեղեկությունը հաստատեցին ՀՀ ԱՆ ՔԿԾ հանրային կապերի բաժնից:

Համաներում հայտարարելու մասին օրենքն ուժի մեջ է մտել այսօր: Այսօրվանից ՔԿՀ-ներում համաներմամբ դատապարտյալներին ազատելու գործընթացը սկսվել է:

Հիշեցնենք, որ Շանթ Հարությունյանը դատապարտվել էր 6 տարվա ազատազրկման՝ 2013 թվականի Մաշտոցի պողոտայում տեղի ունեցած բախումներից հետո: Նա մեղավոր է ճանաչվել խուլիգանություն կատարելու համար:

6 տարվա ազատազրկման դատապարտված Շանթը կտրականապես հրաժարվում էր դուրս գալ կալանավայրից, բաց ռեժիմով կրել պատիժը՝ պահանջելով արդարացում:


Շանթն ու մոտ մեկ տասնյակ ընկերները 2014 թվականին դատապարտվեցին 1-ից յոթ տարվա ազատազրկման՝ քաղաքական հնչեղության գործերով հայտնի Մնացական Մարտիրոսյանի կողմից:

Ամեն տարի նոյեմբերի 5-ին աշխարհի տարբեր ծայրերում կազմակերպվում է Անոնիմուսների երթ, որի ընթացքում մարդիկ իրենց բողոքի ձայնն են բարձրացնում: Նրանք կրում են Գայ Ֆոքսի դիմակներ եւ ձեռքներին ունենում են փայտեր: Այդպես էլ 4 տարի առաջ «Ցեղակրոն» կուսակցության նախագահ Շանթ Հարությունյանն ու նրա աջակիցները՝ դիմակներով, ձեռքերին փայտեր, փորձեցին Անոնիմուսների երթի միջոցով հեղափոխություն իրականացնել: Երթով պետք է շարժվեին Բաղրամյան 26: Սակայն ոստիկանները Մաշտոցի պողոտայում կասեցրին երթը, որի հետեւանքով բախումներ տեղի ունեցան, պայթյուններ հնչեցին: Ոստիկանները բերման ենթարկեցին 37 ակտիվիստի: Բախումների հետեւանքով տուժեց 16 մարդ, այդ թվում՝ 8 ոստիկան:

Բախումներից հետո ձերբակալվեցին, ապա կալանավորվեցին Շանթ Հարությունյանն ու նրա 12 ընկերները: Մեկ տարի տեւած դատավարությունից հետո Շանթ Հարությունյանը, ու նրա ընկերները դատապարտվեցին ազատազրկման:

Աղբյուրը՝ armtimes.com

Понравилась статья? Поделиться с друзьями: